موقع الأيهم صالح

هذه الحكاية ..لا تقصد دولة عربيّة بعينها ..ولكنها تقصد كل الدول ..هذه الحكاية لا تعرف اسماً محدّداً ولكنها كل الأسماء ..لأننا هزمنا عسكريّاً ( وزارة الدفاع ) وهزمنا سياسياً ( وزارة الخارجيّة ) ..لأن هذا الزمن هو زمن توتو..!! واليكم الحكاية ..ورجاءً ما حدا يسب لأني سامع تهمير :- قال الولد ( توتو ) إللي عمره طْنَعْشَرْ سنة للماما : يا ماما ..بدي أصير وزير ..!! ابتسمت الماما و وضعت علبة المناكير جانباً و حضنت طفلها و قالت : لأُدّام شوي يا ماما ..بعد ما تصير تلبس ( البنتلون / البنطلون ) لحالك ..!! صار عمر ( توتو ) تِسِعْطَعْشَرْ سنة ؛ فجاء ينطنط : هيه هيه ..لبست ( البنتلون / البنطلون ) لحالي ..يا الله يا ماما بدي أصير وزير ..!! توقفت الماما عن ( تَمْييْش ) شعرها ..وابتسمت وقالت : لسه يا ماما بدري عليك ..بس تصير تعرف تشلحو لحالك . لأُدّام شوي يا ماما.!! صار عمر ( توتو ) اثنين وعشرين سنة ..فجاءها يلبس ( شورت ) والفرح يملأ قسمات وجهه ..رأته الماما ..تركت ملقط حواجبها ..وسألته : وين بنتلونك / بنطلونك ..؟؟ ذاب الولد ضحكاً ناعماً وقال : ما أنا شلحتو لحالي .. يا الله ؛ بدي أصير وزير ..!! حضنت الماما ولدها كمان مرّة وشدّت من عزيمته : بدك تصبر ..هلا يا ماما لازم تعرف توكل لحالك .. لأُدّام شوي يا ماما..وبتصير وزير ..!! صار عمر الولد خمسة وعشرين ..فنادى على الماما من الغرفة الثانية : إلحئي يا ماما إلحَئي ..!! تركت الماما ( قلم روجها ) وتوجهت نحو الولد ..رأته أمام عشرة صحون فارغة ..قالت : والله وكبرت يا توتو وصرت توكل لحالك ..!! فنط الولد ( توتو ) من الفرح يعني رح أصير وزير ..؟؟ حضنته الماما وهي تمسح ( شدوقه ) من أثر الكاتش أب ..وقالت : رح تصير وزير .. لأُدّام شوي يا ماما..بس تصير تعرف ترقص ديسكو ..!! صار عمر توتو ثلاثة وثلاثين سنة.. دخل غرفة الماما وهو يضع ( هتفون ) في أُذنيه ويرقص ديسكو ..وقال : شوفي يا ماما ..توتو صار ( بَتَل / بطل ) الديسكو ..!! نطّت الماما بفرح ..رقصت مع توتو شوية ديسكو ..ورفعت سماعة التلفون ..مع مين حكت ..لا أعرف ..!! بعد ستة أشهر ..صار توتو ..وزيراً للدفاع ..وحين يشتد الخَطْب وتقع المصائب ..يصبح توتو وزيراً للخارجيّة بالوكالة ..!! كامل النصيرات : كاتب وناقد ساخر في كتاباته دمعة مخفية وابتسامة جميلة abo_baghdad@yahoo.com