يوم في حياة موظف سوري ..؟؟

المنتديات
syrianews
يوم في حياة موظف... بقلم : اكثم العلي
كعادته كل صباح..استيقظ باكرا..تناول طعام الافطار..ارتدى ثيابه..وعند الباب قبل ابنته الصغيرة وذهب الى العمل..و كالعادة ايضا,كانت جارته تمارس هوايتها اليومية بصنع بحيرة ماء صغيرة وهي تغسل مدخل البناء..بدأ بالقفز كالأرنب كي لا يتبلل..



- يعني ما بعرف ليش كل مرة بكون عم اشطف ,بتجي سيادتك وبتوسخ ورايي ؟

- يعني شو رأيك..من وين بدي روح على دوامي..من الشباك بالتلفريك ؟

بعدين بلا الشطف كل يوم ..الناس ما عندا مي للشرب وانتي عم تكبيها كب.

- النظافة من الايمان.

- المبذرين اخوان الشياطين.

- لك الله يساعد مرتك..لو كنت مكانا كنت طلقتك.

- لو كنتي مكانا كنت انتحرت.

- درب يسد ما يرد.

..يمضي دون ان يلتفت خلفه..يصعد سيارته ويهم بالقيادة بكل هدوء..يقفز ابن جارته الاخرى كالقرد امامه..يجمد في مكانه..يأتيه صوت جارته من النافذة كالمطحنة..

- شو يا.. لو انك ادعستو كنت فرحت فيك مو ؟

- طيب مو شرط تخلفو وترمو ولادكن بالشارع.

- ليش الشارع ملك ابوك..ولا لأنو عندك سيارة بدك تموتنا؟

- لك الله يساعد هالحكومة..قال بطالة قال..لك من وين بدها تأمن وظائف للناس اذا انتو بتخلفو متل القطط و الدواجن؟

- الله بيبعت مع كل ولد رزقتو.

- اي..الله ياخدك.

...يمضي بسيارته من الطريق الفرعية الى الشارع العام..امتار قليلة وبعدهاتوجد عبارة / انتبه حفريات..الطريق مقفلة /..اراد ان يعود بسيارته الى الخلف..لكنه لم يستطع..تراكمت السيارات خلف بعضها البعض..ارتفعت ابواق السيارات..وارتفعت اصوات السائقين وسط زوبعة من الغبار المتصاعد..

نظر الى رجل كان بالقرب من المكان..يبدو انه المسؤول عما يحدث,كان بالقرب من الحفريات وقال له

- لك يا اخي اكتبو كلمة انتبه حفريات ببداية الطريق مو بنهايتو..

- كنا كاتبينا,بس يمكن شي سائق دعسها

- بس قللولنا ايمت رح تخلص شركة الهاتف حفريات منشان الله.

- نحنا مو هاتف استاذ..نحنا صرف صحي.

- يا حبيبي..مرة هاتف..مرة كهربا..مرة صرف صحي..لك ليش ما بتنسقو سوا وبتريحونا..لك انا بدي افهم مجلس المدينة ليش موجود اصلا؟

- ليش بعمرك شفت مدينة بلا مجلس ؟

- ليش بعمرك شفت مجلس بلا مدينة ؟

- ليش هاي مو مدينة؟

- هاي مدينة هاي..هاي هيروشيما.

...تعالت الصيحات وارتفع الصراخ و الغبار وسط عصفورية حقيقية.

..وصل متأخرا الى مكتب مراقب الدوام..نظر اليه مراقب الدوام معاتبا و قال له

- يعني منيح هلق سجلك تأخر على البطاقة..شو الواحد بدو يحكي بس..لك انت بتعرف ليش متقدمين بالغرب اكتر منا هون ؟

- لأنو ما بيشطفو الصبح.

- لا..مو صحيح.

- لأنو ما بيخلفو ولاد كتير.

- كمان مو صحيح.

- لأنو مافي حفريات بالشوارع عندن.

- كمان لا..ما حزرت..لأنو بيقدرو قبمة الوقت وما بيتأخرو عن العمل.

- لك يسلملي ربك ما احلاك وانت رايق هيك و مكيف..وعم تتفلسف.

...وصل الى مكتبه و بدأ العمل بنشاط..دخل الى مكتبه احد المراجعين طالبا توقيعه على معاملة بيده..دقق بها طويلا..قلب جميع الاوراق..نظر الى الرجل وقال له

- المعاملة غير قانونية

- حاج علاك مصدي..مانك شايف باسم مين المعاملة يعني؟

- اخي..الاوامر اوامر..انا ما بوقع اذا ما كان كل شي قانوني

- طيب رح توقع وانت عم تضحك وهلق بنشوف.

..خرج المراجع غاضبا ودخل الى مكتب المدير..وما هي الا لحظات قليلة حتى استدعاه المدير

- لك يا اخي ليش مزعل الاستاذ ؟

- لأنو المعاملة مخالفة للمواصفات وغير قانونية.

- لك حبيبي شو مواصفات وشو قانون..العمى بعيونك..هاي المعاملة كتير بتهمنا..وقع احسن ما عضك هاه.

- اذا عضيتو القانون, وقفت عليي انا.

- وقع بلا فلسفة..تضرب على هالموديل متل موديل الستينات.

-...سلم المعاملة صاغرا الى صاحبها سوبرمان..وفي نهاية الدوام اليومي,استقل سيارته باتجاه المنزل وسط سيمفونية صاخبة من الضجيج وابواق السيارات..وصل الى منزله..غير ثيابه..تناول القليل من الطعام..والقى بجسده المنهك فوق السرير بينما كانت زوجته تمارس هوايتها اليومية في تنظيف المنزل كالنملة.

...في المساء جلس يشاهد برامج التلفزيون وبيده / جهاز التحكم / وبدأ جولته المسائية من قناة الى اخرى..كل قناة تأتي بخصمين الى جانب المحرض / المزيع /وتبدأ الشتائم..انبطاحيون ...خونة..مرتزقة..يأتي الجواب من الاخر,عملاء.. اذناب..وهكذا..وكلما هدأت المعركة,يشعلها المحرض من جديد,وفي نهاية البرنامج يصاب بصداع حاد بالرأس...

..ذهب الى فراشه..كانت زوجته قد سبقته اليه منذ قليل / اندفس / الى جانبها..وضع يده على خصرها..وبدأ بالاقتراب منها متوددا شيئا فشيئا ..نهرته بعصبية وقالت له

- شو يا..بالنهار شغل و بالليل شغل..مانك شايفني تعبانة من الشغل طول اليوم..شو يا..شو هالحياة..ما حدا بيقدر..العمى.

...تجمدت يداه قرفا من نفسه..الصق بصره بسقف الغرفة..واستسلم للنوم..في صباح اليوم التالي..استيقظ باكرا..تناول فطوره..قبل ابنته..وذهب للعمل

ليس من كتاباتي ولكن للمبدع اكثم العلي الذي اختفى فجأة ؟؟

التعليقات

دعوة للمشاركة

موقع الأيهم صالح يرحب بالمشاركات والتعليقات ويدعو القراء الراغبين بالمشاركة إلى فتح حساب في الموقع أو تسجيل الدخول إلى حسابهم. المزيد من المعلومات متاح في صفحة المجتمع.